Toshkent va Samarqand shaharlarida xizmat qilayotgan harbiy xizmatchilarga turar joyni ijaraga olganlik uchun to‘lanadigan har oylik pul kompensatsiyasi miqdori 25 foizga oshirildi.
Bu Hukumatning 2026-yil 7-iyuldagi qarori bilan Vazirlar Mahkamasining 2005-yil 25-iyuldagi 169-son qaroriga kiritilgan o‘zgartirishlarda belgilandi.
Yangi tartibga ko‘ra, harbiy xizmatchilarga ijara xarajatlari uchun quyidagi miqdorlarda kompensatsiya to‘lanadi:
- Toshkent shahrida — bazaviy hisoblash miqdorining (BHM) 6 baravarigacha;
- Samarqand shahrida — BHMning 4,5 baravarigacha;
- Nukus shahri va boshqa viloyatlar markazlarida — BHMning 3,6 baravarigacha.
Shuningdek, harbiy xizmatchining oila a’zolari soni uch kishi va undan ortiq bo‘lsa, belgilangan pul kompensatsiyasi miqdori 50 foizga oshiriladi.
Mazkur o‘zgartirish Prezidentning 2026-yil 8-iyundagi qarorida belgilangan topshiriqlar ijrosini ta’minlash maqsadida qabul qilindi. Ushbu hujjat bilan Toshkent va Samarqand shaharlarida harbiy xizmatchilarga ijara uchun to‘lanadigan kompensatsiyani 25 foizga oshirish nazarda tutilgan edi.