Turkiyada 29 yoshli O‘zbekiston fuqarosi bo‘lgan ayolning vafot etgani yuzasidan surishtiruv ishlari olib borilmoqda. Bu haqda O‘zbekistonning Istanbul shahridagi Bosh konsulxonasi xabar berdi.
Ma’lum qilinishicha, ayol 29-may kuni vafot etgan. Holat to‘g‘risidagi ma’lumot Bosh konsulxonaga kelib tushganidan so‘ng Turkiyaning tegishli idoralari bilan hamkorlikda zarur ishlar boshlangan.
Diplomatik vakolatxona marhumaning yaqinlariga konsullik-huquqiy yordam ko‘rsatilayotganini ma’lum qilgan. Shuningdek, jasadni O‘zbekistonga qaytarish bilan bog‘liq tashkiliy masalalar ham hal etilmoqda.
Bosh konsulxona voqea yuzasidan vakolatli organlar tomonidan surishtiruv ishlari davom ettirilayotganini bildirgan.
Shuningdek, diplomatik vakolatxona may oyi boshida Turkiyaning Sakarya Province hududidagi alyuminiy zavodida sodir bo‘lgan baxtsiz hodisa oqibatida 54 yoshli O‘zbekiston fuqarosi ham vafot etganini eslatdi.
Qayd etilishicha, mazkur holat yuzasidan ham Turkiyaning huquqni muhofaza qiluvchi organlari va tibbiyot muassasalari bilan hamkorlikda zarur protsessual hamda konsullik-huquqiy tadbirlar amalga oshirilgan. Natijada marhumning jasadi O‘zbekistonga yuborilgan.