Janubiy Koreyada o‘zbekistonlik ishchi baxtsiz hodisa oqibatida vafot etdi

Janubiy Koreyaning Chungchong-Namdo provinsiyasi, Sosan shahridagi metall eritish zavodida 50 yoshli O‘zbekiston fuqarosi baxtsiz hodisa oqibatida vafot etdi.

Janubiy Koreya politsiyasi va mehnat organlari ma’lumotiga ko‘ra, hodisa 8-mart kuni Seosan Auto Valley sanoat zonasidagi zavodda sodir bo‘lgan.

Ma’lum qilinishicha, o‘zbekistonlik ishchi ishlab turgan paytda harakatlanib kelayotgan yuk ko‘targich uni urib yuborgan. Shundan so‘ng u zavoddagi og‘ir materiallar ostida qolib ketgan.

Voqea joyiga yetib kelgan qutqaruvchilar jabrlanuvchini og‘ir ahvolda shifoxonaga olib ketgan. Biroq shifokorlarning sa’y-harakatlariga qaramay, u vafot etgan.

Dastlabki taxminlarga ko‘ra, hodisa yuk ko‘targich haydovchisi o‘z qarshisida turgan ishchini payqamay qolgani sabab yuz bergan. Hozirda politsiya va mehnat inspeksiyasi voqea tafsilotlarini o‘rganmoqda.