O‘zbekistonda oltin quymalar yana qimmatlashdi — bir gramm narxi 1,85 mln so‘mga yaqinlashdi

O‘zbekistonda 2026-yil 20-yanvar kuni oltin quymalar narxi yana oshdi. O‘zbekiston Markaziy banki ma’lumotiga ko‘ra, bir gramm oltinning narxi 1 mln 848 ming 800 so‘mni tashkil etdi.

Shu kundan boshlab oltin quymalarining chakana narxlari quyidagicha belgilandi:

• 5 gramm — 9 mln 244 ming so‘m;

• 10 gramm — 18 mln 488 ming so‘m;

• 20 gramm — 36 mln 975 ming so‘m;

• 50 gramm — 92 mln 439 ming so‘m;

• 100 gramm — 184 mln 877 ming so‘m.

Avvalroq, 12-yanvar kuni 5 grammli oltin quyma narxi ilk bor 9 million so‘mdan oshgani qayd etilgan edi. Oradan bir kun o‘tib, 13-yanvarda narxlar yana 2,3 foizga ko‘tarilib, 5 grammli quyma 9 mln 215 ming so‘mga yetgan. 14-yanvar kuni esa ushbu ko‘rsatkich 9 mln 262 ming so‘mni tashkil etgan.

Shuningdek, Markaziy bank 5-yanvardan boshlab oltin quymalarini qaytarib sotib olish narxlarini e’lon qilishni boshlagan. Qaytarib olish narxlari quyma qadog‘ining butligi yoki buzilganiga, ya’ni texnik talablarga mos kelish-kelmasligiga qarab farqlanadi.

Markaziy bank ma’lumotiga ko‘ra, xalqaro qimmatbaho metallar bozori konyunkturasidan kelib chiqib, oltin narxlari kun davomida qayta ko‘rib chiqilishi mumkin.