Bandlik va mehnat munosabatlari vazirligi matbuot kotibi Gulnoza Alimovaning ma’lum qilishicha, Air Samarkand aviakompaniyasi xodimlarining ish haqi to‘lanmayotgani yuzasidan o‘nga yaqin fuqaro vazirlikka murojaat qilgan.
Ularning 2025-yil iyun–avgust oylarida to‘lanmagan uch oylik ish haqlarini undirib berish maqsadida Davlat mehnat inspeksiyasi tomonidan fuqarolik ishlari bo‘yicha Samarqand shahar sudiga jami 1,5 milliard so‘mlik da’vo arizalari kiritildi. Da’volarda qonunchilikka muvofiq, kechiktirilgan har bir kun uchun pulli kompensatsiya ham hisoblab qo‘shilgan.
Avvalroq aviakompaniya xodimlarga uch oydan buyon oylik berilmayotgani haqida izoh bergan edi. Rasmiy bayonotda bu vaziyat bahor va yoz oylarida butun havo kemalari parkiga rejadan tashqari texnik xizmat ko‘rsatish ishlari amalga oshirilgani, natijada rejalashtirilmagan xarajatlar yuzaga kelgani bilan izohlangan.
Rahbariyatning ta’kidlashicha, ustuvor vazifa — ish haqi bo‘yicha qarzdorlikni imkon qadar qisqa muddatda qoplash va vaziyatni barqarorlashtirishdir.