Tramp oilasi 499 dollarlik «Oltin smartfon»ni sotuvga chiqaradi

Shuningdek, Trump Mobile tarmog‘ini ishga tushiradi. Trump Organization kompaniyasi Trump Mobile tarmog‘ini ishga tushirishini, shuningdek, T1 smartfonini «nozik oltin qoplamada» chiqarishini e’lon qildi, deb xabar berdi The Verge. Trump Mobile oyiga $47,45 evaziga yagona cheksiz tarifni taklif qiladi. T1 smartfonining narxi 499 dollarga teng. Ta’kidlanishicha, u AQSh hududida ishlab chiqariladi va joriy yilda sotuvga chiqadi. «Trump Mobile uyali telefonlar va mobil aloqada inqilob qilmoqchi», dedi AQSh prezidentining o‘rtancha o‘g‘li va Trump Organization vitse-prezidenti Erik Tramp. The Verge nashriga ko‘ra, Trump Mobile tarifi boshqa operatorlarning shu kabi takliflariga qaraganda qimmatroq. T1 smartfonining texnik xususiyatlari esa hayratlanarli emas.